ကျားမရေးရာ အားလုံးပါဝင်မှုရှိသော ငြိမ်းချမ်းရေးတည်ဆောက်ခြင်း
မကြာခဏဆိုသလို ပဋိပက္ခအခင်းအကျင်းတွင် ကျား/မရေးရာ သုံးသပ်လေ့လာမှုကို နောက်မှသာ တွေးမိတတ်ကြသည်။ အကောင်အထည်ဖော်ကြရာတွင်လည်း အားလုံးကို ခြုံငုံထားသည့် အလွန်အကျူး ရိုးရှင်းအောင် ပြုပြင်ထားသော နည်းလမ်းတစ်ခုတည်းဖြင့်သာ ကိုင်တယ်လေ့ရှိကြသည်။ ဤမိတ်ဆက်သင်ခန်းစာသည် ငြိမ်းချမ်းရေး တည်ဆောက်ခြင်း အစီအစဥ်များရေးဆွဲရာတွင် စီမံကိန်း ဒီဇိုင်းရေးဆွဲခြင်းမှသည် စီမံကိန်း လက်တွေ့အကောင်အထည်ဖော်သည်အထိ ကျား/မရေးရာ သုံးသပ်လေ့လာမှု ကို ထည့်သွင်းအသုံးပြုရန် အဘယ့်ကြောင့် အရေးကြီးကြောင်း မိတ်ဆက်ပေးရန် ဖြစ်သည်။
ဤသင်ခန်းစာ၏ နှလုံးသည်းပွတ်သည် အားလုံးပါဝင်မှုရှိသည့် ကျားမရေးရာ မူဘောင်နှင့် သဘောတရားများ (GIFT) ဟူသည့် စီမံကိန်း ဒီဇိုင်းများတွင် ကျားမရေးရာ လေ့လာသုံးသပ်မှု ပေါင်းစပ်ထည့်သွင်းရန် ထောက်ပံ့ကူညီပေးသည့် အယူအဆလမ်းညွှန် ဖြစ်ပါသည်။ GIFT ၏ အပိုင်းသုံးပိုင်းအနက် တစ်ခုစီသည် ပဋိပက္ခတွင် ကျားမရေးရာ အခြေပြု ကွဲပြားခြားနားမှုကို အတွင်းကျကျ သိမြင်နားလည်စေရန် ရှင်းပြထားသည်။ ထိုနည်းတူစွာ ပိုမိုခြုံငုံလွှမ်းခြုံသော ၊ အပြောင်းအလဲဖြစ်စေနိုင်သော ကျားမရေးရာ အားလုံးပါဝင်သည့် အစီအစဥ်ရေးဆွဲခြင်းအတွက် လမ်းဖွင့်ပေးထားသည်။ ဤသင်ခန်းစာကို ငြိမ်းချမ်းရေးတည်ဆောက်ခြင်း အတွက်ရည်ရွယ်၍ ဖန်တီးရေးဆွဲထားသော်လည်း ပါဝင်သည့် အယူအဆများစွာသည် ကျယ်ပြန့်သော ဖွံ့ဖြိုးရေးနယ်ပယ်နှင့် ထိရှလွယ် ပတ်ဝန်းကျင်တွင် လုပ်ဆောင်ရမည့် အခြားသောစီမံကိန်းများအတွက်လဲ ဆီလျော်အသုံးဝင်ပါသည်။
သင်ခန်းစာရည်ရွယ်ချက်များ
ဤသင်ခန်းစာအပြီးတွင် သင်သည် အောက်ပါတို့ကို ပြုလုပ်နိုင်လာပါမည် -
- လူမှုယဥ်ကျေးမှု ရှုထောင့်မှ ကျား/မရေးရာကို အဓိပ္ပါယ်ဖွင့်ဆိုနိုင်လာမည်
- ပဋိပက္ခလေ့လာသုံးသပ်ခြင်းနှင့် ငြိမ်းချမ်းရေးတည်ဆောက်ခြင်းတွင် ကျားမရေးရာ၏ အရေးပါပုံကို ရှင်းပြနိုင်လာမည်
- စီမံကိန်းဒီဇိုင်းများတွင် ကျားမရေးရာ လေ့လာသုံးသပ်ခြင်းကို ပေါင်းစည်းထည့်သွင်းခြင်းဖြင့် ရရှိနိုင်မည့် အကျိုးကျေးဇူးများနှင့် ကျားမရေးရာ လေ့လာသုံးသပ်ခြင်း မပါဝင်လျှင်ဖြစ်ပေါ်လာနိုင်သည့် အားနည်းချက်များကို ဆွေးနွေးနိုင်လာမည်
- GIFT ၏ အစိတ်အပိုင်းသုံးခုကို ဖော်ပြ၍ အပိုင်းတစ်ခုစီက ကျားမရေးရာ လေ့လာသုံးသပ်ခြင်းတွင် အဘယ်သို့ပါဝင်သည်ကို ဖော်ထုတ်နိုင်လာမည်
- GIFT ၏အပိုင်းသုံးခုကို အသုံးပြုထားသည့် ပဋိပက္ခ လေ့လာသုံးသပ်ခြင်းဆိုင်ရာ မေးခွန်းများ ထုတ်နိုင်လာမည်
သင်ခန်းစာ ကြာမြင့်ချိန်
တစ်ဦးနှင့်တစ်ဦး သင်ယူလေ့လာသည့်ပုံစံ မတူညီသော်လည်း သင်တန်းသားအများစုသည် ဤသင်ခန်းစာကို အချိန် ၄-၆ နာရီအတွင်း ပြီးဆုံးကြသည်။
သင်တန်းနည်းပြများ
- ကက်သလင်း ခီးနက်စ် ၊ ညွှန်ကြားရေးမှူး ၊ ကျားမရေးရာ မူဝါဒနှင့် မဟာဗျူဟာ ဌာန ၊ အမေရိကန် ငြိမ်းချမ်းရေး အင်စတီကျု့ ၊ ကျားမရေးရာ အားလုံးပါဝင်သည့် မူဘောင်နှင့် သဘောတရားစာအုပ် ရေးသားသူ
- ရီဘက္ကာအက္ဘနီဇာ အက်ဘီရိုလာ ၊ အကြီးတန်း ပရိုဂရမ် အရာရှိ ၊ အမေရိကန် ငြိမ်းချမ်းရေး အင်စတီကျု့
- အန်ဒရေဂါစီယာ မာတိနီ ၊ ပရိုဂရမ်မန်နေဂျာ ၊ အမေရိကန် ငြိမ်းချမ်းရေး အင်စတီကျု့
- နီဂါ အဘေ၊ ပရိုဂရမ်အရာရှိ ၊ အမေရိကန် ငြိမ်းချမ်းရေး အင်စတီကျု့
- ဒန်နီယယ် ရောဘတ်ဆင် ၊ ပရိုဂရမ်အရာရှိ ၊ အမေရိကန် ငြိမ်းချမ်းရေး အင်စတီကျု့ ၊ ကျားမရေးရာ အားလုံးပါဝင်သည့် မူဘောင်နှင့် သဘောတရားစာအုပ်ကို ပူးတွဲ ရေးသားသူ
- အီလီနာ လန်ကတ်စတာ ၊ အကြီးတန်း ပရိုဂရမ်အရာရှိ ၊ အမေရိကန် ငြိမ်းချမ်းရေး အင်စတီကျု့
GIFT လမ်းညွှန်စာအုပ်နှင့် ယခုသင်ခန်းစာတွင် အသုံးပြုထားသည့် အနုပညာလက်ရာများအား Luba Lukova က ဖန်တီးထားခြင်း ဖြစ်ပါသည်။ သင်ခန်းစာဗွီဒီယိုများတွင် အသုံးပြုထားသည့် ဓါတ်ပုံများ၏ ဖန်တီးသူများကို သင်ခန်းစာ တစ်ခုစီ၏ ဗွီဒီယိုစာသားများတွင် လင့်ခ်ထည့်သွင်းပေးထားပါသည်။
